Thursday, May 17, 2018

RAIS KENYATTA ATIA SAINI SHERIA YA MAKOSA YA KIMTANDAO

Rais wa Kenya Uhuru Kenyatta ametia saini mswada wa Sheria ya Uhalifu wa Kompyuta na Mtandaoni ya mwaka 2018 kuwa Sheria, hatua hii itatoa adhabu kali kwa watakaopatikana na makossa ya mtandaoni.

Sheria hiyo inatoa adhabu ya faini ya Milioni 100 (dola 50,000 za Marekani) au kifungo cha miaka miwili jela, au adhabu zote mbili, kwa atakayepatikana na kosa la uenezaji wa habari za uzushi.

Mtu atakayepatikana na kosa la kueneza taarifa ambazo zinaweza kuzua taharuki au kuzua vurugu atafungwa jela zaidi ya miaka kumi.

Hatua hiyo imepokelewa kwa hisia na maoni tofauti kwa watu mbalimbali ambapo kiongozi wa zamani wa chama cha wanasheria Kenya Apollo Mboya amenukuliwa na vyombo vya habari akisema kifungu hicho kinaweza kuwapa watawala ‘uhuru’ wa kukandamiza vyombo vya habari.

Kwa upande mwingine shirika la kimataifa la kutetea uhuru wa wanahabari Committee to Protect Journalists (CPJ) nalo limekuwa likipinga uidhinishaji wa mswada huo.

MWIZI ALIYEGANDWA NA MAHINDI MGONGONI AACHIWA HURU; ATOA USHAURI HUU (VIDEO)

ZARI: KUNA MAISHA BAADA YA KUACHANA NA DIAMOND

UKWELI ni kwamba kwenye mapenzi kuna maumivu ya namna tofauti. Kuna kuacha na kuachwa. Yanapotokea mambo hayo kwenye maisha yako, si wakati wa kuendelea kulialia kila kukicha. Nini cha kufanya? Ni kufuta machozi na kusonga mbele kwani kuna maisha baada ya hayo yote.

Zarinah Hassan Tiale, waweza kumwita Zari The Boss Lady. Ni mwanamama mburudishaji Afrika Mashariki, mjasiriamali na mama wa watoto watano ambaye anasema kwamba, licha ya kutengana na baba wa watoto wake wawili, Tiffah na Nillan ambaye ni staa wa muziki wa Afro-Pop Afrika, Nasibu Abdul ‘Diamond Platnumz’, ameamua kusonga mbele maana maisha lazima yaendelee.

Wikiendi iliyopita Zari aliteka vyombo vya habari jijini Nairobi, Kenya alipohudhuria kwenye shoo aliyoalikwa kama mgeni rasmi ya Colour Purple Concert iliyolenga kutoa hamasa juu ya vita dhidi ya kansa. Mara baada ya kutua nchini humo alifanyiwa mahojiano na vituo vitatu tofauti vya runinga na kufunguka mambo mengi, ikiwemo ishu ya kuachana na Diamond. Hapa tunakuletea baadhi ya maswali na majibu ambayo yamekuwa yakiulizwa kwenye mitandao ya kijamii bila yeye mwenyewe kuyajibu, lakini sasa yamepata majibu.
Swali: Kwa asiyekufahamu, Zari ni nani?
Zari: Mkurugenzi wa Vyuo vya Brooklyn (vipo Afrika Kusini), mwanamke jasiri, mama wa watoto watano na mwanamke anayewashawishi vijana wadogo kujitambua na kuwa watu fulani kwenye jamii.

Swali: Umesema ni mama wa watoto watano, lakini tunajua unalea mwenyewe bila baba zao, je, huwa unapata wapi sapoti?

Zari: Ni kweli sina sapoti ya baba zao, naamini wengi wanajua kilichotokea kwa baba zao. Napata sapoti kutoka kwa ndugu zangu, kaka na dada zangu. Pia kuna mtu anaitwa Kinje (mtoto wa mzee Kingunge) kutoka Tanzania. Mara nyingi huwa ninamtegemea na likitokea lolote ananishauri juu ya familia.

Swali: Mara nyingi tunaona picha zako ukiwa na wanao kwenye mitandao ya kijamii, je, huwa unawafundisha nini?

Jibu: Kwa wa kiume, maana ninao wanne, ninawafundisha kuwa na heshima na hasa kuwaheshimu wanawake. Tiffah yeye ni mwanamke wa kipekee. Huwa ninamjenga kuwa mwanamke kamili kwa kujiamini na kuwa imara. Anapenda kupika, ninamjengea mazingira ya kuwa mwanamke kamili.

Swali: Je, wanachukuliaje maisha yako ya mitandaoni hasa wanapoona unatukanwa na mambo mengine kama hayo?

Zari: Wale wanajua, kuna Zari wa mitandaoni na kuna mama yao ambaye ni mtu tofauti kabisa na yule wa mitandao ya kijamii.
Swali: Wengi tunaweza kuwa hatujui, ni nini hasa kilikufanya uachane na Diamond?
Zari: Wanawake wengi wanakutana na mambo ya ajabu kwenye uhusiano, lakini wanaogopa kutoka. Wengine wanaamini wakiwa wenyewe hawawezi. Kweli nilimpenda sana (Diamond) na nilikuwa tayari kwa lolote, lakini sipendi mtu anikosee heshima. Angeweza kufanya mambo yake yote ya kutembea na wanawake wote, lakini aniheshimu. Alizidisha kutoniheshimu. Mimi ninapenda kuheshimiwa. Bila yeye, mimi nasonga mbele kwa sababu bado kuna maisha.

Swali: Umefuata nini Kenya?Zari: Napenda kusaidia jamii, nipo hapa kuhamasisha watu hasa mabinti wadogo kujua vita dhidi ya kansa. Unajua watu wengi hawajui, lakini mama yangu (Halima Hassan) alikufa kwa kansa. Ilichelewa sana kugundulika. Kilichogundulika mapema ilikuwa ni kisukari na presha, lakini baadaye madaktari ndipo waligundua ana kansa ambayo ilikuwa imefikia kwenye ngazi mbaya. Nilimwona mama yangu alivyokuwa akiteseka kwa sababu ukimuona mama yangu unakuwa umeniona mimi. Hivyo ndiyo maana huwa ninahamasisha vita ya kansa.
Swali: Umekumbusha kipindi kile ulipofiwa na mama yako yalisemwa mengi ikiwemo wewe kutolia, je, ilikuwaje?
Zari: Unajua mimi nilikuwa ndiye kila kitu na kila mmoja wakiwemo wanangu walitegemea sana uimara wangu. Kama nilivyosema, mama yangu alikuwa ameteseka sana. Kutokana na hali yake ilivyokuwa, nilikuwa nimejiandaa kisaikolojia ndiyo maana sikulia. Pia nilikuwa nimeshalia sana maana nilijua kilichokuwa kinakuja mbele yangu.
Usisahau mama yangu alifariki dunia wiki saba tu baada ya Ivan (aliyekuwa mumewe kabla ya Diamond) kufariki dunia. Na wakati huohuo nilikuwa kwenye matatizo na x wangu (Diamond) kutokana na ku-cheat (kusaliti) na mwanamke mwingine (Hamisa Mobetto). Ilikuwa kama kuna mtu ameamua kunipiga makofi kwelikweli, yaani ukigeuka huku unasikia paa…ukigeuka huku unasikia paa…

Swali: Tunajua kwenu ni Uganda, je, Afrika Kusini unaishi wapi? Na je, ni kwako?
Zari: Yeah…kwetu ni Uganda, lakini nimekuwa nikiishi Afrika Kusini huu ni mwaka wa 18. Na kule ninaishi nyumbani kwangu jijini Pretoria. Ni mji mzuri wa kibiashara na kitalii. Pako vizuri sana, ninapapenda.

Swali: Kwenye mitandao ya kijamii kumekuwa na maneno mengi juu ya umri wako huku kila mtu akitaja wa kwake, je, una umri wa miaka mingapi?
Zari: Nina umri wa miaka 37 na mwaka huu ninatimiza umri wa miaka 38. Kuna wengine huwa wanasema nina miaka 45, lakini hata wangesema nina miaka 100 hakuna shida ilimradi tu mimi ninajielewa.

Swali: Zari una kila kitu kwa maana ya utajiri, magari na nyumba, je, unatamani kuwa na nini tena maishani mwako?
Zari: Private jet (ndege binafsi)…yees…private jet na ni lazima niwe nayo kwa sababu nipo kwenye mipango hiyo.

Swali: Baada ya kuachana na Diamond mwanaume wako kwa sasa ni nani?
Zari: Ni kweli mimi ni mwanamke mzuri, mwanamke wa mfano, nina kila kitu anachohitaji mwanaume na ni mwanamke anayejua future (maisha ya baadaye) hivyo kila mwanaume angetamani kuwa na mimi. Lakini kwa sasa sina, ninahitaji kupumzika kwanza na nipo huru sana. Ni kweli kuna foleni ndefu ya wanaume wanaonitaka, lakini mimi sihitaji. Nawaangalia watoto wangu kwanza, nataka litakapotokea la kutokea niwaachie kitu cha kujivunia na siyo wateseke. Halafu pia nikiwa na mwanaume lazima itajulikana tu maana mimi ni maarufu kwa hiyo ataonekana kila mahali kwenye mitandao ya kijamii.


LULU AUVAA MOTO WA MAMA KANUMBA


Wakati chozi la furaha ya kupunguziwa adhabu likiwa bado halijamkauka muigizaji Elizabeth Michael ‘Lulu’, mama wa aliyekuwa mchumba wa muigizaji huyo, marehemu Steven Kanumba, Flora Mtegoa amefungua kinywa chake na kuliamsha dude kuhusu tukio hatua hiyo.

Lulu aliyekuwa akitumikia kifungo chake cha miaka miwili katika Gereza la Segerea, alipunguziwa adhabu hiyo Mei 12, mwaka huu kufuatia amri ya Mahakama Kuu huku taarifa ya magereza ikieleza kuwa mrembo huyo, alipunguziwa robo ya kifungo chake kutoka kwenye msamaha wa Rais Dk John Pombe Magufuli.

Msamaha huo aliutoa Rais, Aprili 26, mwaka huu mjini Dodoma katika Sherehe za Maadhimisho ya Miaka 54 ya Muungano wa Tanganyika na Zanzibar ambapo alitoa msamaha huo kwa wafungwa mbalimbali nchini akiwemo Lulu aliyefungwa kwa kosa la kumuua bila kukusudia, Kanumba.


LULU AFICHWA
Mara baada ya mrembo huyo kutoka gerezani Jumamosi, Risasi Mchanganyiko lilifanya jitihada za makusudi kumtafuta mrembo huyo pamoja na familia yake lakini ilibainika kuwa ni ngumu huku ikionekana walidhamiria kutomuanika hadharani mpaka hapo watakapoona inafaa.

Jumapili iliyopita, Risasi Mchanganyiko lilijaribu kuwatafuta watu wa karibu na Lulu akiwemo mama yake mzazi, Lucrecia Karugila ambaye alitoa maneno ya shombo huku akiomba aachwe kwani yeye hana taarifa za Lulu kutoka gerezani na hapendi mambo aliyoyaita kuwa ni ya kidaku.

Risasi Mchanganyiko: Naongea na mama Lulu?

Mama Lulu: Hapana mimi ni Farida wa Tanga. Utakuwa umekosea namba.

Baada ya muda mfupi…
Risasi Mchanganyiko lilifanya uchunguzi wa sekunde kadhaa na kugundua namba ile ambayo ilijibu kuwa ni Farida wa Tanga ni ya mama Lulu baada ya kuingia kwenye upande wa WhatsApp na kugundua ni mama Lulu kisha kumpigia kwa mtandao huo.

Risasi Mchanganyiko: Mama yangu hakuna sababu ya kutuzungusha, tafadhali tueleze tu ukweli, Lulu ametoka?

Mama Lulu: Ametoka wapi? Hebu acha mambo yako ya udaku. Ametoka wewe upo naye? Mimi kama mama yake mzazi sina hiyo taarifa, wewe umezitoa wapi? Acheni mambo yenu bwana, tena nakuambia sitaki uandike hizo habari. Nitakuja hapo ofisini kwenu, nitamueleza bosi wenu.

Risasi Mchanganyiko likaachana na mama Lulu na kumgeukia rafiki mkubwa wa familia, muigizaji Mahsein Awadhi ‘Dk Cheni’ ambaye naye alikanusha taarifa za Lulu kutoka gerezani.

“Nyinyi ni watu wangu. Angetoka ningewaambia,” alisema Dk Cheni.

Baada ya familia hiyo kuonekana ‘kumficha’ Lulu, Jumatato Jeshi la Magereza lilithibitisha Lulu kupunguziwa adhabu ambapo Risasi Mchanganyiko lilimgeukia mama mama Kanumba ambaye aliporomosha moto wa aina yake kupitia simu ya mkononi.


HUYU HAPA MAMA KANUMBA
“Nawashukuru wote waliofanikisha kutoka kwa Lulu lakini wakae wakitambua kwamba sijafurahia kabisa, imeniuma maana naona kama haki haijakaa sawa.

“Najua Lulu na ndugu zake wanasherehekea sasa hivi lakini wakae wakijua sijafurahishwa na kilichotokea. Kanumba alikuwa akiwalipia kodi Lulu na mama yake lakini leo wanafanya haya wanayoyafanya kweli? Bora hata wangemuacha atumikie kidogo adhabu lakini namuachia Mungu,” alisema mama Kanumba huku sauti yake ikiashiria kuwa analia.

VITA UPYA
Hii si mara ya kwanza mama Kanumba kumcharukia Lulu, kabla ya mrembo huyo kuhukumiwa, bi mkubwa huyo amekuwa akimlalamikia kwa kitendo chake cha kutomjali huku akijua fika yeye ni mama ambaye angeweza kuwa mkwewe kama kifo cha mwanaye kisingetokea.Kutokana na kauli hiyo, ni dhahiri sasa bifu la mama Kanumba na familia ya Lulu litakuwa limekolea upya!

TUJIKUMBUSHE
Lulu alihukumiwa kwenda jela miaka miwili Novemba 13, 2017 baada ya kukutwa na hatia ya kumuua bila kukusudia, aliyekuwa mpenzi wake, Kanumba kosa ambalo alidaiwa kulifanya Aprili 7, 2012 nyumbani kwa marehemu, Sinza-Vatican jijini Dar es Salaam.

WANAFUNZI NA WADAU WAILALAMIKIA BODI YA MIKOPO

Zikiwa zimepita takribani siku 6 tokea kulipofunguliwa dirisha la uombaji mikopo kwa njia ya mtandao nchini, wanafunzi na wadau mbalimbali wameendelea kuilalamikia Bodi ya Mikopo kwa kuweka vigezo vigumu bila ya kuwafikilia kwa undani watu wanaotaka kufaidika nayo.

Akizungumza kwenye kipindi cha EATV Saa 1 Katibu wa Mtandao wa Wanafunzi nchini (TSNP), Joseph Malecela amesema katika utoaji wa mikopo hiyo kumekuwa na ubaguzi wa upendeleo kwa baadhi ya michepuo ya wanafunzi hasa hasa wanaosomea Sayansi huku wengine wakikosa kabisa.

Mbali na hilo, Malecela amesema ni vyema Bodi ya Mikopo itoe ufafanuzi zaidi juu ya kifungu cha muongozo wa kuomba Mkopo Na 1.0 (vii) ambacho kinasema 'waombaji ambao wazazi au walezi ni wamiliki wa biashara, mameneja wakubwa katika mamlaka zinazotambulika zenye usajili, hawaruhusiwi kuomba mkopo'.

"Sisi tunachojiuliza kama Mtandao wa wanafunzi Tanzania kwamba tuna mfumo gani wa mkopo ambao unaweza kupima kiwango cha uwezo wa mzazi katika kuweza kumudu hizo gharama, na madodoso gani yamewekwa ili kujua huyu mtu anafanya biashara kubwa hata kama si Meneja mkubwa," amesema Malecela.

Kwa upande wake Afisa Mawasiliano Mwandamizi kutoka Bodi ya Mikopo ya Elimu ya Juu Bi. Veneranda Malima amesema kifungu hicho kipo sawa na hawawezi kusema kwamba kitaondolewa.

ESHA BUHETI AFUNGUKIA KUHUSU KUMTAFUTIA MKE ALI KIBA (VIDEO)

Muigizaji nguli wa Filamu Bongo, Esha Buheti amefungukia kuhusu tetesi zilizokuwa zikisambaa mitandaoni kuwa yeye ndiye aliyemtafutia mke Mfalme wa Bongo Fleva, Alikiba ‘King Kiba’ ambaye ameoa wiki chache zilizopita huko Mombasa nchini Kenya.


DOTNATA APATA PIGO KUBWA!

MASKINI! Mwanamama mkongwe wa filamu za Kibongo, Illuminata Poshi ‘Dotnata’, amepata pigo baada ya kufiwa na mama yake mzazi, Ildegalda Alphonce aliyefariki dunia juzi, Jumatatu, asubuhi katika Hospitali ya Boch, Dar baada ya kuugua kwa muda mrefu.

Akizungumza na Za Motomoto News, Dotnata alisema kuwa, kifo cha mama yake kimeacha pengo kubwa katika familia kwani kama mzazi, alikuwa na umuhimu mkubwa kwao, lakini ndiyo mapenzi ya Mungu hawawezi kuyapinga.

“Kufiwa na mama siyo jambo dogo, ni kubwa mno, mama yetu ametuachia pengo kubwa na tutamkumbuka sana kwa mengi, ameugua kansa (hakupenda kutaja ya nini) kwa muda mrefu na ameteseka sana kwa kweli ndipo Mungu akaamua kumpumzisha. Tunaumia sana, lakini inabidi tukubaliane na kilichotokea maana kila nafsi lazima itaonja mauti. Tulimpenda mama yetu, lakini Mungu amempenda zaidi,” alisema Dotnata huku akilia kwa uchungu.

Mwili wa mama wa Dotnata ulitarajiwa kusafirishwa kwenda Bukoba mkoani Kagera, lakini mpaka gazeti hili linakwenda mtamboni walikuwa hawajapanga siku ya kuusafirisha na msiba upo nyumbani kwa dada yake Dotnata, Segerea, Dar. Mungu ailaze roho yake mahali pema peponi. Amen!

SERIKALI YAPOTEZA MILIONI 39

Mamlaka ya Mapato Tanzania (TRA), imekamata malori mawili yenye bidhaa mbalimbali eneo la Loliondo Wilaya ya Ngorongoro mkoani Arusha kupitia njia ya magendo yakitokea nchini Kenya zenye thamani ya zaidi ya shilingi milioni 20.

Akizungumza Jana jijini Arusha, Kamishna Mkuu wa TRA Bw. Charles Kichere amesema kuwa, malori hayo yenye namba T985AJP na T840ABF yalikamatwa usiku wa tarehe 10 Mei, 2018 na kusisitiza kuwa wafanyabiashara wenye bidhaa hizo wamevunja sheria kwa kuwa hawakulipa kodi stahiki kama inavyotakiwa.

Kichere amefafanua kuwa, wafanyabiashara wenye bidhaa hizi zilizokamatwa, wamevunja kifungu cha sheria namba 82 na 200 cha Sheria ya Usimamizi wa Kodi ya Mwaka 2015 na Sheria ya Forodha ya Afrika Mashariki ya Mwaka 2004.

"Kwa ujumla bidhaa hizi zote zina thamani ya shilingi 20,037,330.15 ambayo kodi ya bidhaa hizi ni shillingi 28,524,758.11 na adhabu au faini ya bidhaa hizi ni shilingi 10,768,665.08. Hivyo jumla ya mapato
yanayotakiwa kulipwa Serikalini ni shilingi 39,293,423.19," Kichere.

Ameongeza kuwa "Hivyo kwa Sheria hizo, wafanyabiashara hawa wanatakiwa kulipa kodi pamoja na faini ya shilingi milioni 39 na magari yao kutaifishwa".

Amezitaja bidhaa zilizokamatwa kuwa ni pamoja na mifuko 362 ya sukari yenye uzito wa kilo 50 kila mmoja, maboksi 40 ya mafuta ya kula yanayoitwa Karibu, maboksi matatu ya mafuta ya kula yanayoitwa Daria, magaloni 100 ya mafuta ya kula yanayoitwa Nyata na maboksi matatu ya viungo vya mboga

Kufuatia tukio hilo, Kamishna Mkuu Kichere amewakumbusha wafanyabiashara wote kuzingatia taratibu za uingizaji bidhaa nchini ili kuepuka hasara kwenye biashara zao na kuongeza kuwa, TRA haitavumilia ukiukwaji wowote utakaofanywa na wafanyabiashara kwa kutozingatia sheria na taratibu hizo.

MUME ASHUHUDIA MKEWE AKIUAWA

Jeshi la Polisi katika wilaya ya Gomba nchini Uganda linachunguza tukio la kuuawa kwa mwanamke mjamzito aliyejulikana kwa jina la Amina Nabukeera (19) katika Kijiji cha Bakandula.

Akisimulia tukio hilo mume wa marehemu Bwana Arafat Kabuubi amesema tukio hilo limetokea juzi Mei 15, 2018 muda wa saa mbili usiku wakati akiwa na mkewe wakielekea kununua mahitaji ya nyumbani

“Mimi na mke wangu tulikuwa tunaenda moja ya maeneo ya biashara muda wa saa mbili usiku kununua mahitaji ya nyumbani, nilikua nikitembea mbele yake kabla sijasikia purukushani nyuma yangu na nilipogeuka niliona mtu akimshambulia mke wangu kwa kumpiga na nyundo kichwani, alimkata sikio la upande wa kulia pamoja na taya kwa kutumia panga kabla ya kukimbia. niliogopa sana na nilikosa nguvu za kumpigania mke wangu” amesema bwana Kabuubi.

Bwana Kabuubi aliongeza kuwa alijaribu kupiga kelele za kuomba msaada lakini alikua tayari amechelewa kumuokoa mke wake ambae alifariki wakati akitafuta usafiri wa kumpeleka katika kituo kidogo cha afya.

Mkuu wa Polisi katika mkoa wa Katonga Kamanda Joseph Musana amethibitisha kutokea kwa tukio hilo na kuomba wananchi kuwa watulivu wakati Jeshi la Polisi likiendelea na uchunguzi wa kumbaini mtuhumiwa.

Hilo ni tukio la pili kwa marehemu kushambuliwa ambapo mwezi Machi mwaka huu alishambuliwa akiwa nyumbani kwake lakini alipatiwa matibabu katika kituo kidogo cha afya.

Mwili wa marehemu umehifadhiwa katika Hospitali ya Rufaa ya mkoa wa Gomba ukisubiri kufanyiwa uchunguzi wa kidaktari.

MBASHA NAYE NDANI YA SKENDO YA KUTELEKEZA MTOTO

DAR ES SALAAM: Mambo ni hivi! Achana na staa wa Bongo Fleva, Ally Salehe Kiba ‘Alikiba’ kuburuzwa mahakamani kwa kushindwa kutoa matunzo ya mtoto, mwimbaji wa Injili, Emmanuel Mbasha naye amekutwa na skendo kama hiyo baada ya kudaiwa kumtelekeza mwanaye mwenye umri wa miaka mitatu, Risasi Mchanganyiko linakuwa la kwanza kukuletea mkanda kamili.

Chanzo makini kililieleza Risasi Mchanganyiko kwamba, hivi karibuni Mbasha aliburuzwa katika Mahakama ya Hakimu Mkazi Kisutu jijini Dar na mama mtoto wake ambaye ni mjasiriamali anayejulikana kwa jina la Miriam Kawishe. Miriam alimlalamkia Mbasha kumtelekezea mtoto huyo waliyezaa pamoja aitwate Avantica kwa kutompa matunzo tangu azaliwe hadi hivi sasa ambapo ana umri wa miaka mitatu.

“Unajua Mbasha naye ameburuzwa mahakamani kwa kesi ya kushindwa kutoa matunzo ya mtoto tangu alipozaliwa hadi sasa ana miaka mitatu na ilianza kutajwa wiki iliyopita huku ikitarajiwa kuendelea tena mwisho wa mwezi huu.“Ninyi mtafuteni huyo mzazi mwenzake atawaeleza vizuri,” kilisema chanzo hicho.

Baada ya kupata habari hiyo, Risasi Mchanganyiko lilimtafuta mwanamama huyo aliyezaa na Mbasha, Miriam ambaye alikiri kwamba ni kweli, lakini hawezi kuzungumza sana kwani kwa sasa suala hilo liko mahakamani tayari pia ana wakili anayelisimamia.

Wimbi la mastaa kudaiwa kutelekeza watoto na kushindwa kuwapatia matunzo limeendelea kuzidi kila kukicha ambapo lilianza kwa staa wa Bongo Fleva, Nasibu Abdul ‘Diamond’ kukataa kutoa matunzo kwa mtoto aliyezaa na mwanamitindo Hamisa Mobetto na kupelekeshana mahakamani.

Hivi karibuni Alikiba naye aliburuzwa mahakamani kwa skendo kama hiyo na mpaka sasa kesi yake inaendelea.
CHANZO: GLOBAL PUBLISHERS

TRUMP AFICHUA MALIPO KWA NYOTA WA FILAMU ZA NGONO STORMY DANIELS

Rais wa Marekani Donald Trump alifichua rasmi kuwa alirejesha fedha kwa wakili wake baada ya kumlipa nyota wa filamu za ngono ili kumzuia kufichua uhusiano wao.

Ofisi ya Maadili ya Serikali ya Marekani iligundua Jumatano kuwa Trump huenda alifichua malipo hayo akitangaza matumizi ya fedha awali.

Matumizi hayo ya fedha yanaonyesha kuwa alimlipa Michael Cohen kwa matumizi ya fedha ya mwaka 2016 kati ya dola 100,001 na 250,000.

Malipo kwa Stormy Daniels yanaweza kuwa tatizo la kisheria kwa rais kwa sababu yanaweza kuonekana kama matumizi mabaya ya pesa za kampeni.

Awali Trump alikana kufahamu malipo ya dola 130,000 kwa Stormy Daniels.

Bwana Cohen, hata hivyo, amekubali kulipa zaidi ya dola laki moja na thelathini kwa nyota wa masuala ya ngono Stormy Daniels muda mfupi kabla ya uchaguzi mkuu wa Uraisi mnamo mwaka 2016.

Stormy anaeleza kuwa alilipwa kiasi hicho ili kumziba mdomo kuhusiana na kuwepo na tuhuma za uhusiano baina yake na bwana Trump na inajitokeza sasa kinyume na makubaliano ya awali.

Mnamo mwezi Aprili, raisi Trump alisema hakumbuki kama bwana Cohen alikuwa amemlipa Bi Daniels kabla ya uchaguzi wa 2016. Malipo ya Trump kwa Cohen mara ya kwanza yalithibitishwa na Rudy Giuliani, ambaye ni mmoja wa mawakili wa rais katika mahojiano ya televisheni.

Bwana Giuliani anasema shughuli hiyo ilikuwa na kazi moja tu kumnyamazisha bi Daniels kuhusu "mashtaka ya uwongo na ya udanganyifu" kwamba alifanya ngono na Trump, lengo likiwa ni kumsafisha mgombea nafasi ya uraisi wa wakati huo ambaye sasa ni rais wa Marekani.

Baadaye wiki hiyo hiyo, Raisi alisema Bwana Giuliani alihitaji muda wa kukusanya taarifa za ukweli.

VICHWA VYA HABARI VYA MAGAZETI YA LEO ALHAMISI 17/05/2018